"Баастын" уулыг даваад "шээстийн" голыг гатлаад...

Дотор муухайруулам юм үгүүлж магадгүй гэдгийг анхаараарай эрхэм уншигчдаа!

Наймдугаар ангиасаа эхлэн би зуныхаа амралтаар  эгчийнхээ ажилладаг ногооны захад "туслах" хийдэг байлаа. Туслах гэхээр "хөгийн" сонсогдож магадгүй ч лангууны ард жинхэнэ найруулагчийн ажлыг хийнэ шүү дээ. Цэвэрлэнэ, арилгана, арчина,  сэгсэрнэ, нүднэ, дэвсэнэ, услана, шүршинэ, шороодно, үрнэ, зүлгэнэ, үртэсдэнэ,  "хар алтдана"...хэхэ. Зарим содон нэр томьёонуудыг тайлбарлахыг надаас битгий хүсээрэй. Зайлшгүй нууцлах зүйл гэж бас байнаа. Наймаа гэж юуг хэлдэгийг та бүхэн надаас илүү мэдэх хойно. Хамгийн гол нь лангуун дээр гараад худалдан авагчийн нүдэнд тусахаар болгох нь л миний ажил. Ажилд минь хэрэглэгддэг дээрх олон аргуудыг "хужаа" ногоон дээр л ашигладагт миний хэлэх гэсэн санаа байгаа юм. За, за нялуунаас шулуун гэж бид "хужаагийн баас шээсийг" л идэж байгаа юм байна лээ! Урдаас орж ирсэн ногоог цэвэрлэхээр задлахад ялангуяа төмсөнд "баас" маш их байдаг.  "Баас" гэдэг нь муудсан төмс л дөө. Гэхдээ үнэр нь яг баас, жорлон, нойл... өөр юу гэдэг юм. Энэ удаад хашилтгүй бичлээ чин үнэн учраас.  Заримдаа бүр огиудас хүрэм ямар муухай үнэртэй гээч. Тэр нь бас өтчихсөн ирэхийг ч хэлэх үү! Бодохоос л бүр...Хүний ам руу орох зүйл шүү дээ.

Худалч хүнд "баастын" уулыг даваад "шээстийн" голыг гатлаад ирсэн юм шиг л. Ингээд одоо миний ажил эхлэнэ дээ. Зузаахан бээлий өмсөөд, амны хаалт хийж байгаад л "үзэж дарна".

Баасандаа нялагадагдчихсан төмснүүдийг үртэстэй хольж сэгсэрнэ, өнгө муутайг нь байцааны хальс, эсвэл ус хийж сэгсэрнэ. Нүдэж шороог нь унагаан "халцалж" шинэ мэт болгоно. Лууванг хальсгүй болтол нь үрнэ гэх мэт. Энэ бүхний эцэст таны худалдан авдаг лангуун дээрх "царайлаг" хүнсний ногоонууд бэлэн болдог юм. Гэхдээ зөвхөн хятад ногоон дээр ийм арчилгаа шаардагддагийг дахин хэлье.  "Баастай төмс", "Модон голтой лууван", "Жацагатсан байцаа". Уран зохиолын нэрүүд шиг санагдаж байна уу? Үгүй дээ , би шууд утгаар нь хэлж байна. Хямдханыг хараад  ийм л юм идэж сууна шүү дээ ах дүүс минь. Болж өгвөл монгол ногоогоо л идмээр авч зуны гурван сардаа яах аргагүй хятад ногоонд ноёлуулчихна. Зоориноос гарсан  монгол ногооных нь үнэ тэнгэрт хадчихаар яалтай ч билээ дээ. Эрүүл мэндийн аюулгүй байдлын тухай зах зухаас нь өөрийнхөө мэдсэнээр хэлэхэд ийм л, ийм л байна даа!

2008.08.03-ны өдрийн тэмдэглэлээсээ сэдэвлэн бичив.